Steiner Wochenend

Hoi Mitenand

So i wer au wiedo vo de tote Uferstande und cha jetzt do öbers Wocheend brichte. Wie immer isch da Wocheend s Highlight vo ösere ganze Saison. Agfange hets am Samstignomittag. Mer hend am Chindermaskeball im Büheler gspielt. De Uftrett isch en super Uftackt is Wocheend gse. Noch em Büehler hetmo eigentlich noch Ziit gha, zom sich nomel chli usruebe. Ösen ehemolgige OG het abo Geburi gha und somit hetmo do nöd efoch chöne hego go ane ligge. So ischmo den gad direkt of die Nüni an Maskeball Stää gange. Do hemmo ös den chöne nomel richtig Istimme of de Uftrett. De Uftrett selbo isch supo gse. Mer und s Publikum hend alles ge. De Uftrett isch viel z’schnell verbi gse. Do bi ös amel de Obet nochem Uftrett nöd fertig isch, isches den au dementsprechend spoot worde. E paar hartgsotteni Narre hend natürlich wie immer d Nacht dörre gmacht. Mer hets den ene au am Morge agse abo da isch den rasch wiedo öberschminkt worde. Mer hend nämli am 11 scho wiedo de nöchst Uftrett gha. S’Früehschoppe Konzert het dasjohr i de Halle stattgfonde. D’Halle isch trotz dere früeh Stonde guet gföllt gse. Dasjohr het soger ösen Präsi en Zettel gschrebe för sini asproch. Jedoch momo sege, er hets amel gad so guet au ohni Zettel gmacht.
Am Nomittag hemo den chöne am Chindermaskeball spiele. Da isch au dasjohr wieder super gse. Mer hönd ös natürli au öber e Sujet gfreut, weles ösi 40 Johre Dorfnarre Gschicht wiedergspieglet het.
Noch dem super Uftrett hemmo den nomel zwo Stonde mösse öberbröcke, bismo hend chöne am Bögg spiele. Dos aber recht fest gloftet het, hemo dasjohr efoch de Omzog dörs Dorf gmacht und aschlüssend bim Füürwerdepot ghört.
Am Mentigobet isch den ösen letste Uftrett gse. Mer hend nomel en super Obet verbrocht und den en würdige Schlussuftrett aneglet.

So da wers gse vo mer för die Saison. Jedoch gots för d Dorfnarre scho bald wieder wiiter. Wie er wösset fiiromo dasjohr öses 40 jöhrige. Somit gsiend mer ös spötistens am 14.6. am Jubiläumsfest oder den vom 15.-16.6.19 am Grömpeli Stää.

 

Es Grüsst

De Guggeblogger

 

 

Gossau und Appenzell

Hoi Mitenand

Au ösers zwot letste Wocheend isch scho wieder verbi. S Wocheend hat dasmol bereits scho am Schmutzigedonstig z Appezell agfange. Paar Narre hend sich als Mexikaner verkleidet und sind an Schmudo of Appezell gange.
A parne Narre hetmo de Schmudo soger no am Fritig agse. Den am Fritig simmo wieder offiziell als Dorfnarre onderwegs gse und hend im Landhus z Abtwil agfange. Isch en supo gse und me hönd ös ohni grosse Stress chöne of da Wocheend istimme. Noch em Landhus simmo den of Gossau gange und hend i de Geisterbar nomol en dörre ge. Obwohl mer a dem Obet nüd vollzählig gse sind, hemmo glich en super Uftrett gha. Do de OG wäret em Uftrett mol no chorz abglenkt gse isch, hemmo den au no spontan no mösse improvisiere. Abo au da isch ke Problem gse und  isch bim Publikum guet acho.
Am Samstig isches den au scho wiedo früeh los gange. Am halbi zölfi simmo bereits go schminke. Den am Zwo het de Omzog i Appezell agfange. Au dasjohr hets wieder viel verschiedeni und vielfälltgi Wäge gha. De Omzog het dasjohr chli länger duuret, do anschienend en Bus of de Strecki abglege isch und de zerst het mösse abgschlept werden. Do mo abo supo Omzogswetter gha hend, isch da ke Problem gse. Noch em Omzog hemmo chöne chli „usruebe“ bis am Nüni. Am Nüni hemmo nämli ösen erste Uftrett a dem Obet gha. Mer sind au die erste gse wo i de Plattenegg gspielt hend. Au do isch de Platz scho voll gflöllt gse und s Publikum het super mitgmacht. De letst Uftrett isch den bim Sterneplatz gse. Au do isches wieder e wahri Freud gse, vor so vielne Lüüt z spiele.

So noch dem intensive Wocheend mömo ös wieder chli erhole dasmo den nöchst Woche z Stää nomel alles chönd ge. I wünsche eu allne e schöni Woche und me gsiet sich spötistens nöchste Samstig z Stää am Maskeball.

Es Grüsst

De Guggeblogger

Valida und Haslen

Hoi Mitenand

Scho isch wieder e närrisches Wocheend dörre. De erst Uftrett da Wocheend, hemmo am Maskeball Valida z St. Galle gha. De Uftrett isch super gse und s Publikum het super mitgmacht. Os dem Grond hemmo dosse nomel 2-3 Klasskiker os ösem Repetuar gspielt. Noch dem Uftrett wäromo eigentlich of Herisau id Face Bar gange. Leider hets do chorzfristigi Änderige ge und mer hend den ösen Uftrett i de Krone Hondwil gmacht. A dere Stell tönd mer ös ganz herzlich bi dene Lüüt entschuldige wo wege ös id Face Bar gange sind.
Am Samstig isches abo den au bereits am Mittag wieder los gange. Mer sind of Hasle und hend dai am Omzog und Chindermaskeball gspielt. Trotz em super Wetter hemmo ösen Uftrett am Chindermaskeball nüd mit de gwohnte Liechtigkeit chöne dörrefüehre. Jedoch hemmo au do wieder e super Publikum gha. Noch dene zwo Uftrett hemmo ös den im Rössli chöne chli usruebe. Am Obet isches den am Siebni mit em Mönsterli wiiter gange. Noch de 3 Lieder isches nüd lang gange und mer hend am Maskeball Hasle chöne spiele. De Uftrett isch wieder de hammo gse. Au wenn mer die erste gse sind a dem Obet, isch d Halle scho volle gse und s Publikum voll debi.
Noch dem super Uftrett hemmo ös den au no es zwo Bierli a de Bar gegönnt.

So das wers wiedo gse vo mer för da Wocheend. Goot abo nüd lang bis mer ösi Instrument wieder före nemmet. E chlini Delegation vo Narre werd am Schmudo Appezell vertrette se. Am Fritig machomo den wieder e Beieztour und am Samstig simmo wie gwohnt z Appezell am Omzog und nocho of de zwo verschiedene Bühnene.

I dem Fall adios Muchachos und bis am Donnstig.

 

Es Grüsst de

Señor Guggenblogger

Untereggen und Wattwil

Gschätzdi Dorfnarre Fründe und Fründinne

Da Wocheend hemmo wie er wösset, e super Programm gha. Am Fritig hemmo en super Uftrett am Schrei i Onderegge gha. Noch dem mer ös gschminkt hend, hemmo no chli Ziit gha bis zom Uftrett und hend ös no paar Lokalitäte im Omkreis vo Onderegge bsuecht. Mer sönd den gad Rechtziitig zom Uftrett itroffe. Da isch bis jetzt ösi erst Guggeparty id ere Saison gse. Me het gmerkt, dass ösen OG voller Elan debi gse isch und s Programm ohni grossi Pausene dörre zoge het. Da het den au dezue gfüehrt, dass mer ös nochem Uftrett hend mösse bi de Bar niederlo und de Stress abbaue.
Noch dem mer am Sasmstig hend chöne usschlofe, hemmo ösen nöchste Uftrett am 21.50 i Wattwil gha. Au do hemmo ös zerst i diverse verschiedene Beize „igwärmt“. De Uftrett i Wattwil isch super gse. Dank de viele Guggene hemmo dai e rechts Fest gha. D Lüüt hend au super mitgmacht und oseme Chopfwippe, isch den schnell mol e Mitsingete oder Tanze worde. Do mer e sehr sportilichi Gugge sönd, hemmos ös au do nöd ne loh, ösi akrobatischi Künst z zege. Es isch immer wieder verblüffend wamo mit somene Stuehl alles cha mache.

So noch dem super Wocheend wünschi eu allne no e schöni und ruesahmi Woche. Mer gsiet sich nöchste Fritig am Maskeball Valida i St. Galle oder den am Samstig bi de Hasler am Maskeball.

Es Grüsst

De Guggeblogger

Beizentour 2019

Gschätzti Dorfnarrefründe
Es sich wieder so wiit. Da Wocheend het d Fasnachtsaison au för ös agfange.
Mer hend dasjohr i de Krone Hondwil ösers Debüt ge. Noch vielne Probe simmo richtig giggerig (au e Lied womo spielet) gse, zom ösers Können i de Krone zom Beste ge.
Noch dem glungene erste Uftrett, simmo den in Schöngrond id Bläächi Bar gange. Noch em Uftrett sind mer den nebe mol wieder of Stää gange. Dai hend mer ösen letste Uftrett vo dem Obet gha. Do mer i de Gugge generell sehr sportlich sind, hemmo den au z Stää no am Unihockeyturnier gspielt (natürli i de Bar onne). Mer hend nommel alles ge und s Publikum het au super mitgmacht. Noch em Uftrett hend den mer de erst Obet no gmüetlich usklinge lo.
Somit wär s erste Wocheend au bereits wieder dörre. Falls er nöchst Wocheend no nütz ob hend, wöromo ös freue wenn mer mit eu zUnteregge oder zWattwil astosse chöntet.

Es Grüsst

De Guggeblogger

Grömpeli Durchführung

Hoi Mitenand

So es isch bald so wiit und am 24. Grömpeli Stää werd wiedo Fuessball gspielt. Mer hend entschede, dass s Grömpeli am Samstig und Sonntig (23./ 24.06.18) dosse statt föndet. Nemet gnueg Sonnecréme mit, nüd dass es nocho nono roti Mannschafte ofem Platz het.

Es Grüsst

De Guggeblogger

Maskeball Stää

So gschätzti Dorfnarre Fründinne und Fründe
I has endlich gschaft mi einigermasse vo dem Wocheend z erhole und min letste Biitrag för die Guggesaison z schriibe. Wie er alli wösset isch da Wocheend de Stäänermaskeball gse. Jedoch het ösers Wocheend am Samstig z Troge am Chindermaskeball agfange. Zerst hemmo am Omzog mitgmacht und nocho en chline Uftrett i de Turnhalle döre gfüehrt. De Uftrett isch e super (sogenanntes) WarmUP gse.
Noch dem mer ös den dör de Nomittag chli verstreut hend, hemmo ös alli am Obet am Maskeball Stää wiedo troffe. Am Elfi hend mer den ösen Uftrett gha. Mer hend e riiise Fest gha und dank em Publikum het di ganz Halle bebt.
Wie all Johr het au das Johr wiedo e Delegation vo Narre dörre gmacht. So isches den au schnell Elfi worde und mer hend ösers Früehshoppe gha. Da hemmo wie immo mit Bravour dörre gfüehrt (mit ennere erstunliche chorze Asproch vo ösem Präsi) und sind aschlüssend in Hirsche go z Mittag esse.
Am vieri hend den mer bereits chöne am Chindermaskeball dasmol i Stää spiele. Es isch wie immo e riise freud gse vor potenzielle Narre z spiele. Am Obet hemmo den bereits nüme so fit am Bögg gspielt. De Omzog isch trotz de chelti supo verlaufe. Jedoch hets den de Bögg nüd ase pressant gha zom z verbrenne. So hemmo dasjohr s erste Mol chöne miterlebe, wie d Flamme vom Funke erlosche sind. Jedoch isch den d Füürwehr of Nummer sicher gange und het mit Sprit de Funke chöne entzönde.
Am Mentig isch den am Blochball ösen letste Uftrett gse. De isch dasjohr bsonders guet gse und mer so wie au s Publikum (hoffi mol) hends gnosse.

So da wers au scho wiedo gse vo mer. D Fasnachtsaison isch leider scho wiedo dörre. I wünsch eu gueti genesig und hoffe daso nöchst Johr wiedo ischaltet wenns hesst: De Guggeblogger bloggt wiedo im Blog. 🙂

Halt öpis wer fast no ondergange. Falls er nöd chönd e Johr warte biso ös wiedo gsiend, chömet doch am 23.06.18 as Grömpeli Stää mer wöret ös freue.

Es Grüsst

De Guggeblogger

St. George/Appezell

Scho isch wieder e Wochheend dörre. S Wocheend het för ös am Fritig z Abtwil im Landhus agfange. Eigentlich weromo io of Hondwil, jedoch hemmo ös chorzfristig om entschede und sind is Landhuus. Aschlüssend hemmo den bereits am halbi Zehni de nöchst Uftrett z St. George gha. Jedoch simmo recht knapp dra gse, well mer hend no en Narr im Landhuus vergesse. Schluss endlich hemmos abo alli gschaft und hend en super Uftrett aneglegt.

Am Samstig isches bereits wieder am Zwo z Appezell wiiter gange. Mer hend bi recht schönem Wetter chöne de Omzog mitmache.
Nochem Omzog hemmo ös ch d Ziit i verschiedene Wertschafte vertrebe und sind den id Rose go z  Nachtesse gange. Noch dem super z’NachtObet gange, simmo den gstercht an erste Uftrett vom Obet gange. De Uftrett und s Publikum isch super gse. Mer hend huere freud gha J.
Am Zwölfi isch den ösen letste Uftrett vo dem Wocheend gse. Nebst vielne Zueschauer zo dere spoote Ziite hemmo no e Geburtstagsnarrin gha. De Uftrett isch au do supo gse und d Lüüt hend wieder huere guet mitgmacht. Aschlüssend hemmo den de Obet z Appezell usklinge lo.

So da wers scho wieder gse vo dem Wocheend. Nöchst Woche isch den s grosse Saisonfinale z Stää. Hoffe me gsiet sich dai no.

Es Grüsst

De Guggeblogger

Speicher/Haslen

Scho isch wiedo e närrisches Wocheend verbi. S Wocheend het för is recht hektisch agfange. Mer hend am Fritig zerst dörfe amene Geburtstag spiele und nocho of direktem Weg in Ochse z Stää zo de Landfraue. Mer sönd den dai recht verhocket. Of emol isch e gwössi hektik ufcho. Womo den mol wieder of d Uhr glueget hend, isch scho halbi Zehni gse und am Zehni hetet mer io bereits de Uftrett im Spiicher gha. Mer hend den sofort alles verpackt und iglade und sind den mit de offizielle Gschwindigkeitsbegrenzig in Spiicher gfahre. Mer sind den gad no rechtziitig itroffe. Ösen Uftrett isch im Spiicher super gse und s Publikum het super mitgmacht. Noch dem letste Uftrett vom Tag, hemmo den no de Obet gmüetlich usklinge lo.
Am Samstig isches den scho wieder am siebni los gange und mer hend z Hasle dörfe am Mönsterli drü Lieder ne. Aschlüssend simmo den of direktem Weg is Rössli und hend dai au nomel paar Lieder i dere schöne Landschaft gno.
Au do hemmo nüd chöne lang verwiile den am zehni hemmo bereits ösen Hoptuftrett i de Turnhalle gha. De Uftrett isch super gse und s Publikum het wie all Johr super mitgmacht. Do de Obet no jung gse isch, hemmo gnueg Ziit gha da stressig Wocheend uszklinge loo.

So isch e recht hektisches aber super Wocheend dörre gange und mer freuet ös of nöchst Wocheend wemo z St. George und z Appezell chönd spiele.

Gueti Woche und esset gnueg daso Fit förs nöchste Wocheend.

Es Grüsst

De Guggeblogger