Grömpeli Durchführung

Hoi Mitenand

So es isch bald so wiit und am 24. Grömpeli Stää werd wiedo Fuessball gspielt. Mer hend entschede, dass s Grömpeli am Samstig und Sonntig (23./ 24.06.18) dosse statt föndet. Nemet gnueg Sonnecréme mit, nüd dass es nocho nono roti Mannschafte ofem Platz het.

Es Grüsst

De Guggeblogger

Maskeball Stää

So gschätzti Dorfnarre Fründinne und Fründe
I has endlich gschaft mi einigermasse vo dem Wocheend z erhole und min letste Biitrag för die Guggesaison z schriibe. Wie er alli wösset isch da Wocheend de Stäänermaskeball gse. Jedoch het ösers Wocheend am Samstig z Troge am Chindermaskeball agfange. Zerst hemmo am Omzog mitgmacht und nocho en chline Uftrett i de Turnhalle döre gfüehrt. De Uftrett isch e super (sogenanntes) WarmUP gse.
Noch dem mer ös den dör de Nomittag chli verstreut hend, hemmo ös alli am Obet am Maskeball Stää wiedo troffe. Am Elfi hend mer den ösen Uftrett gha. Mer hend e riiise Fest gha und dank em Publikum het di ganz Halle bebt.
Wie all Johr het au das Johr wiedo e Delegation vo Narre dörre gmacht. So isches den au schnell Elfi worde und mer hend ösers Früehshoppe gha. Da hemmo wie immo mit Bravour dörre gfüehrt (mit ennere erstunliche chorze Asproch vo ösem Präsi) und sind aschlüssend in Hirsche go z Mittag esse.
Am vieri hend den mer bereits chöne am Chindermaskeball dasmol i Stää spiele. Es isch wie immo e riise freud gse vor potenzielle Narre z spiele. Am Obet hemmo den bereits nüme so fit am Bögg gspielt. De Omzog isch trotz de chelti supo verlaufe. Jedoch hets den de Bögg nüd ase pressant gha zom z verbrenne. So hemmo dasjohr s erste Mol chöne miterlebe, wie d Flamme vom Funke erlosche sind. Jedoch isch den d Füürwehr of Nummer sicher gange und het mit Sprit de Funke chöne entzönde.
Am Mentig isch den am Blochball ösen letste Uftrett gse. De isch dasjohr bsonders guet gse und mer so wie au s Publikum (hoffi mol) hends gnosse.

So da wers au scho wiedo gse vo mer. D Fasnachtsaison isch leider scho wiedo dörre. I wünsch eu gueti genesig und hoffe daso nöchst Johr wiedo ischaltet wenns hesst: De Guggeblogger bloggt wiedo im Blog. 🙂

Halt öpis wer fast no ondergange. Falls er nöd chönd e Johr warte biso ös wiedo gsiend, chömet doch am 23.06.18 as Grömpeli Stää mer wöret ös freue.

Es Grüsst

De Guggeblogger

St. George/Appezell

Scho isch wieder e Wochheend dörre. S Wocheend het för ös am Fritig z Abtwil im Landhus agfange. Eigentlich weromo io of Hondwil, jedoch hemmo ös chorzfristig om entschede und sind is Landhuus. Aschlüssend hemmo den bereits am halbi Zehni de nöchst Uftrett z St. George gha. Jedoch simmo recht knapp dra gse, well mer hend no en Narr im Landhuus vergesse. Schluss endlich hemmos abo alli gschaft und hend en super Uftrett aneglegt.

Am Samstig isches bereits wieder am Zwo z Appezell wiiter gange. Mer hend bi recht schönem Wetter chöne de Omzog mitmache.
Nochem Omzog hemmo ös ch d Ziit i verschiedene Wertschafte vertrebe und sind den id Rose go z  Nachtesse gange. Noch dem super z’NachtObet gange, simmo den gstercht an erste Uftrett vom Obet gange. De Uftrett und s Publikum isch super gse. Mer hend huere freud gha J.
Am Zwölfi isch den ösen letste Uftrett vo dem Wocheend gse. Nebst vielne Zueschauer zo dere spoote Ziite hemmo no e Geburtstagsnarrin gha. De Uftrett isch au do supo gse und d Lüüt hend wieder huere guet mitgmacht. Aschlüssend hemmo den de Obet z Appezell usklinge lo.

So da wers scho wieder gse vo dem Wocheend. Nöchst Woche isch den s grosse Saisonfinale z Stää. Hoffe me gsiet sich dai no.

Es Grüsst

De Guggeblogger

Speicher/Haslen

Scho isch wiedo e närrisches Wocheend verbi. S Wocheend het för is recht hektisch agfange. Mer hend am Fritig zerst dörfe amene Geburtstag spiele und nocho of direktem Weg in Ochse z Stää zo de Landfraue. Mer sönd den dai recht verhocket. Of emol isch e gwössi hektik ufcho. Womo den mol wieder of d Uhr glueget hend, isch scho halbi Zehni gse und am Zehni hetet mer io bereits de Uftrett im Spiicher gha. Mer hend den sofort alles verpackt und iglade und sind den mit de offizielle Gschwindigkeitsbegrenzig in Spiicher gfahre. Mer sind den gad no rechtziitig itroffe. Ösen Uftrett isch im Spiicher super gse und s Publikum het super mitgmacht. Noch dem letste Uftrett vom Tag, hemmo den no de Obet gmüetlich usklinge lo.
Am Samstig isches den scho wieder am siebni los gange und mer hend z Hasle dörfe am Mönsterli drü Lieder ne. Aschlüssend simmo den of direktem Weg is Rössli und hend dai au nomel paar Lieder i dere schöne Landschaft gno.
Au do hemmo nüd chöne lang verwiile den am zehni hemmo bereits ösen Hoptuftrett i de Turnhalle gha. De Uftrett isch super gse und s Publikum het wie all Johr super mitgmacht. Do de Obet no jung gse isch, hemmo gnueg Ziit gha da stressig Wocheend uszklinge loo.

So isch e recht hektisches aber super Wocheend dörre gange und mer freuet ös of nöchst Wocheend wemo z St. George und z Appezell chönd spiele.

Gueti Woche und esset gnueg daso Fit förs nöchste Wocheend.

Es Grüsst

De Guggeblogger

Appenzell/Bischoffszell

Gschätzti Dorfnarre Fründe
Es isch wiedo so wiit. D Fasnacht Saison het wiedo offiziel fö Ös agfange. Mer hends ger nüme chöne erwarte, drom hemmo am Fritig no chorzfristig e Beizetour i Appezell gmacht. Dai sind mer zerst is Landhus und aschlüssend no is Bäumli gange. D Uftrett sind trotz beengte Bedinige suber döre gfüehrt worde. Obwohls erst de Afang vo de Saison isch und eigentlich gotmo am Afang io alles chli langsam a, hend bereits paar Narre vollgas ge und bis i di frühe Morgestonde d Loft und s Wetter vo de neu aprochene Johresziit gnosse.

Am Samstig simo den of Bischoffszell gange. D Uftrett werdet usglöslet und wiemo wes, hemmo letst Johr mit ösem Glückelf nüd ase guet zoge. Drom hemmo dasmol s frisch rasierte Babyface gschickt. Mer hend den de Uftrett om die Zwölfi ome zoge wa e recht gueti Leistig isch. Noch de Züchig hemmo den zwo Lieder am Urknall gspielt und hend den i d’Halle verschobe. Noch dem mehr den gesse hend, hemmo ös entschede no chorz en abstächer id Morgesonne z mache. Mer hend den ös i de Morgesonne breitgmacht. D Stimmig isch immo besso worde und womo den auno e Fläsche Appezeller spendiert öbercho hend (nomol Danke a de Spender :)), isch den schnell Zwölfi worde und mer sind parat gse för de Uftrett.
De Uftrett isch guet gse und d Lüüt hend au zo dere Ziit no supo mitgmacht.

So da wers scho wiedo gse vo ösem Wocheend. Falls er ös no nüd gse hend simmo nöchst Woche im Spiicher und z Hasle aztröffe. Es get au nebis z Luege, denn mer hend dasjohr neui Gwändli womo cha bestuune und wemo lieb frog sicho au dörf alange :P.

Es Grüsst

De Guggeblogger

Maskeball Stää

S beste Wocheend vo dere Saison isch leider au scho wieder dörre. Mer hend e riise Fest gha da Wocheend. 
De Uftrett am Samstigobet isch nohzue perfekt gse. Di meiste vo ös hend den wies de Bruuch isch d Nacht dörre gmacht.
Am Morge hemmo den i aller Früeh (11.00) ösers Früehshoppe zom beste ge. S Wetter het passt und dank de viele Lüt wo cho sind, sind den au die letste Narre wach worde.
Am Nomittag hemmo no de Uftrett am Chindermaskeball gha. Wie all Johr simmo noch dem Uftrett voll Konfetti.
Am Obet hend mer no en Uftrett bim Bögg gha. De Bögg het schnell brennt. Somit freuomo ös of en schöne Sommer :).

Und den isches au scho so wiit gse und de letst Uftrett vo dere Saison isch agstande. Am Mentig obet hend mer nomel s beste ge. Isch en supo Obet gse mit vielne Guggene und natürlich de Fääschtbänkler. 
Hoffe er hend au e super Saison gha und mer freuet eu am 10./11. Juni 2017 bi ös am Grömpeli chöne z begrüesse.

Guggeblogger Out.

St. Georgen/Appenzell

Scho isch wieder e Wocheend dörre.
Am Fritig sind mer zerst is Landhuus z Winkle go e Ständli spiele. Es isch en super start gse is Wocheend. Nochem Uftrett simmo den no of St. George gfahre und hend ösen letst Uftrett vom Fritig  gha. Obwohls scho recht spoot gse isch, hets glich no recht viel Lüüt gha. Es isch ebefalls en guete Uftrett gse. Die meiste vo ös sind den nochem Uftrett recht schnell he well mer am Samstig bereits wieder am halbi Zwöfli hend mösse go schminke.

Am Samstig simmo den de ganz Tag z Appezell gse. Mer hend ös alli drof gfreut und wo den s Wetter au no gstumme het, isch alles perfekt gse. De Omzog am Zwo isch zwor streng gse aber ös hets trotzdem huere guet gfalle. Nochdem mer ösi wohlverdiente Schlüch am End vom Omzog abgholt hend, simmo den chli verstobe und hend ös den wieder zom Znacht im Rössli troffe. Nochem Znacht hemmo den no es, zwo gspielt om Rössli und sind den breits wieder Richtig Down Town Appezell gange. Am Elfi hemmo den ösen Uftrett i de Plattegg gha. Obwohls scho recht chalt gse isch, het huere schö Lüüt gha und mer hend e riise Fest gha. Nochem Uftrett hemmo den no chorz mösse e Suechaktion starte um en verlorene Trompetelauf z sueche. Abo au de hemmo gfonde :). E Stond spööter isch den au scho ösen letst Uftrett vo dem Obed gse. Obwohl mer alli nüme ganz fit gse sind, hemmo trotzdem no en guete Uftrett gha.

Nöchst Woche gsiemo ös den z Stää. Mer freuet ös scho wemmo ös den dai gsiend.

 

Es Grüsst

De Guggeblogger

Kloten/Haslen

Da Wocheend hemmo z Chlote gstartet. Mer hend ösen Uftrett imene Klub (wo nebis Floor heest) chöne dörre füehre. Leider hets bi ösem Uftrett no nüd so viel Lüüt gha. Jedoch het sich no e andere Gugge os de Innerschwiiz ebefalls i de Klub veriert und hend trotzdem e Fest gha.
Am Samstig isches den wiedo recht früeh z’Hasle los gange. Am Zwo hemmo ösen erste Uftrett am Chinderomzog Hasle gha. Nocho hemmo den direkt am Chindermaskeball no e Ständli ge. Zom Glück hets nocho den nebis zTrinke ge söss hetomo de ganz Samstig nüd chöne so wiiter dörre züche :).
Noch dene zwo Uftrett hemmo ös den chöne chli entspanne und wie all Johr am Spaghettiplausch mitesse. Deno hemmo den am Mönsterli mitgmacht und sind den gad direkt no is Rössli gange und hend dai au nomel en dörre ge.
Somit hemmo ös guet chöne iiwerme und sind parat gse för de gross Uftrett am Maskeball Hasle. De isch super gse und alli Mitglieder hend alls ge. S Publikum het super mitgmacht.

HUERE GUETE UFTRETT GSE.

Nöchst Woche gsiemo ös z St. George oder den zAppezell.
Bis Bald.

De Guggeblogger

Gossau / Gams

Scho isch wieder e Woche verbi und au a dem Wocheend simmo wiedo wiit ome cho. Am Friitig simmer zerst is Bömmli z Appezell gange nochem Uftrett hemmo no nebis trunke und sind den wiiter richtig Gossau. I de Geisterbar hemmo den ösen letst Uftrett vom Friitig gha. Party i de Geisterbar isch trotz dere früehe Stond scho recht am laufe gse. Mer hend en suubere Uftrett ane glet und hend d Stimmig nomel chli steigere chöne.
Am Samstig simmo denn of Gams. Mer sind gad no rechtziitig as Mönsterli cho und hend ohni lang zwarte ösen erste Uftrett chöne absolviere. Nochem Mönsterli isches au nöd lang gange bis zom zwote Uftrett i de Halle ine. Au do hemmo de Uftrett recht früeh gha. Trotz dere früehe Stond hets Publikum super mitgmacht. A dere Stell nomel en Dank ad Delegazion vo de Moorhüüler. De Uftrett isch super gse.
Nochem Uftrett hemmo den gnueg Ziit gha zom bis i di früehe Morgestonde z’feste.

I hoffe er chönd eu alli guet erhole und mer gsiend ös nöchst Woche z Klote onne oder den ganz sicho z Hasle.

 

Es Grüsst

de Guggeblogger

Rapperswil

Der erst Uftrett dasjohr isch au scho wiedo dörre. Mer hend dasjohr ösi Premiere i Rapperswil gha. Dai hemmo möse am Achti ösen Uftrett züche. Dank ösem Glückself (Mäci) hemmo den ösen erste Uftrett am halbi äs törfe absolviere. Me hend also gnueg Ziit gha zom ös mental und physisch of de Uftrett vorzbereite :).
Ziit isch schnell dörre und so isches den au cho dasmo zmol of de Bühni gstande sind. Noch de erste zwo Täkt hemmo ös den scho igspielt gha und den Uftrett suuber dörre brocht.
Nochem Uftrett simmo den no chli verwiiilet und hend den ös wiedo of de Heeweg gmacht.

Somit wünschi eu e gueti Woche und nüd z‘ streng. Me gsien ös nöchst Woche z Gossau und in Gams.

 

Es Grüsst

De Guggenblogger